ಮದ್ಯಸಾರ~ಎಂಟನೇ ರೌಂಡು

ಬೀರು ವಿಸ್ಕಿ ಜಿನ್ನು ವೈನು
ಪರಮಾತ್ಮ ಒಬ್ನೆ ಹೆಸರು ಬೇರೆ
ಹೆಂಡ ಅಂದ್ರೆ ಇನ್ನೂ ವೈನು
ಕನ್ನಡ ಪದಗಳ ಅಮಲೇ ಬೇರೆ

*
ಅನುಭವದಿಂದಲೇ ಬರುವುದು ಎಲ್ಲ
ಸುರಿದ ಬೀರು ನೊರೆ ಉಕ್ಕದಿರುವುದು
ನೆನಪುಗಳ ಬಿರುಮಳೆಗೆ ಸಿಕ್ಕದಿರುವುದು
ಇತರರಿಗೆ ಕಾಣುವಂತೆ ಬಿಕ್ಕದಿರುವುದು

*
ಗುಂಡು ಎಣ್ಣೆ ತೀರ್ಥ
ಅಂದೋರೆಲ್ಲಾ ನಮ್ಮಂಥೋರೆ
ಪರ್ಮಾತ್ಮ ಅಂತ ಕರೆದೋನ್‌ ಮಾತ್ರ
ದೇವರಂಥಾ ಕುಡುಕ ಖರೇ

*
ಖುಷಿಗಾಗಿ ಇಲ್ಲಿಗೆ ಬಂದರೆ
ಪರವಾಗಿಲ್ಲ, ನಿನ್ನಷ್ಟಕ್ಕೆ ಕುಡಿ
ಕೇಕೆ, ಚೀರಾಟ ಬೇಡ, ನೆನಪಿರಲಿ
ನಿನದಲ್ಲ, ಬಾರು ದುಃಖಿತರ ಗುಡಿ

*
ಮದ್ಯಪಾನ ಒಂದು ಧ್ಯಾನ
ಕುಡಿಯಬೇಕು ಒಬ್ಬರೇ
ಸ್ವಗತವೈಭವದಲಿ ಮೈಮರೆತಿರೆ
ಗೆಳೆಯರು ತಾನೆ ಬಂದು ತಬ್ಬರೆ?