ಶಪಿತನ ಹಾಡು 10

23
ನಾವು ತುಟಿ ಹತ್ತಿರ ತಂದಾಗಲೆಲ್ಲಾ
ಗೇಟು ಕಿರ್ ಎಂದು ನೀ ಬೆಚ್ಚಿ ಓಡುತ್ತಿದ್ದೆ
ಎದ್ದು ನಾನು ಮನೆಗೆ ಬಂದರೆ ಇಲ್ಲಿ
ತುಟಿಪಿಟಿಕ್ಕೆನ್ನದ ವ್ಯರ್ಥ ಏಕಾಂತ

24
ಅಂದು ನೀ ಬರಲೇಬೇಕಿತ್ತು ಬರಲಿಲ್ಲ
ಕಾದೇ ಕಾದೆ ಜೋರು ಮಳೆ ಬಂತು
ಜನರೆಲ್ಲ ಓಡಿ ಓಡಿ ತಪ್ಪಿಸಿಕೊಂಡರು
ನಾ ನೆನೆದು ನೆನೆದು ತಪ್ಪಿಸಿಕೊಂಡೆ

25
ಮಿತ್ರರು ನನ್ನನು ಮಿಡಿಸಲಾರರು
ಶತ್ರುಗಳು ನನ್ನನು ಕೆಡಿಸಲಾರರು
ಸಾಧ್ಯವೆ ಹಿಟ್‌ವಿಕೆಟ್ ಆಗುವನ ಗೆಲ್ಲಿಸೋದು
ಆತ್ಮಹತ್ಯೆಗಿಳಿದವನ ಕೊಲ್ಲಿಸೋದು?