Friday, June 6, 2008

ಅಳಿದುಳಿದ ಮದ್ಯಸಾರ!

ನಾನೂ ನಿಮ್ಮಂತೆಯೇ ಮುಗಿಯಿತು ಎಂದುಕೊಂಡಿದ್ದೆ. ಆದರೆ ಆಗ ಬರೆದು ಬಳಸದೆ ಉಳಿದಿದ್ದ ಈ ಪದ್ಯಗಳು ಮೊನ್ನೆ ಸಿಕ್ಕವು. ಸಿನಿಮಾದ ಡಿವಿಡಿಯಲ್ಲಿನ ಡಿಲೀಟೆಡ್ ಸೀನ್‌ಗಳಂತೆ ಓದಿಕೊಳ್ಳಬಹುದೇನೊ ಎನಿಸಿ ಇಲ್ಲಿ ಹಾಕುತ್ತಿರುವೆ. ನಿಜಕ್ಕೂ ಇದು ಕಡೆಯ ಕಂತು!

ತುಸು ಜಾಸ್ತಿ ಆಗಿದೆ ಇಂದು
ಮೈಮೇಲೆ ಬಿದ್ದದ್ದಕ್ಕೆ ಸಾರಿ
ನಿಮ್ಮನ್ಯಾಕೆ ಅಳಿಸಲಿ ಹೇಳಿ
ನನ್ನೆದೆ ಮೇಲ್ ಬಿದ್ದುದ ತೋರಿ

ಯಾರು ಪರೀಕ್ಷೆ ಮಾಡಿದರೇನು
ನೂರು ಪ್ರಶ್ನೆ ಹಾಕಿದರೇನು
ಚೂರೂ ಹೆದರುವುದಿಲ್ಲ ನಾನು
ಬಾರು ಎಲ್ಲಿದೆಯೆಂದು ಗೊತ್ತಿಲ್ಲವೇನು?

ದ್ರೋಹದ ಬೆಂಕಿಯಲಿ ನಾನು
ಉರೀತಿರುವೆ ನಖಶಿಖಾಂತ
ಯಾರು ಕುಡೀತಿದ್ದರು ಹೀಗೆ
ಆಗಿದ್ದರೆಲ್ಲವೂ ಸುಖಾಂತ?

ಪಾರು ಮಾಡೋ ಕೃಷ್ಣಾ
ಪಾರು ಮಾಡೋ
ನಿಯರೆಸ್ಟ್‌ ಬಾರಿನ
ದಾರಿ ತೋರೊ

ಮೋರಿಯಲಿ ಬಿದ್ದವನ ಕಾಣಬಲ್ಲ ನಿಮಗೆ
ಕಾಣದು ಅವನ ನರಕ ಸದೃಶ ಹಗಲು
ಬೆಚ್ಚಿಸುವ ಥರಥರದ ದಿಗಿಲು
ಮತ್ತೀಗ ಅವನು ತೇಲುತಿರುವ ಮುಗಿಲು

ನೀನು ಕೈ ಕೊಟ್ಟದ್ದೂ
ಒಳ್ಳೆಯದೇ ಆಯಿತು
ಇಲ್ಲದಿದ್ದರೆನಗೆ ಮದಿರೆಯ
ಪರಿಚಯವೇ ಆಗುತ್ತಿರಲಿಲ್ಲ

ಆದಿಯೂ ಇಲ್ಲ ಅಂತ್ಯವೂ ಇಲ್ಲ
ನನ್ನದೊಂದು ವಿಚಿತ್ರ ವ್ಯಥೆ
ಮದ್ಯದಲ್ಲೇ ಶುರುವಾದದ್ದು
ಮದ್ಯದಲ್ಲೇ ಮುಗಿವುದೆ ಕತೆ?

4 comments:

Anonymous said...

Apaara,
Good ones.
I kindof miss you comment-ree.
Why aren't you posting them? They are really enjoyable.

-Tina

Anonymous said...

ಕಂತುಪಿತ,
ಮದ್ಯಕ್ಕಿಲ್ಲ ಇಂಥದ್ದೇ ಮಂತು
ಮದ್ಯಕ್ಕಿಲ್ಲ ಕೊನೆಯ ಕಂತು
ಅಳಿದೂ ಉಳಿಯುವ ಅಪಾರ
ಸಾಧ್ಯತೆಗೆ
ಒಂದೇ ದಾರಿ ಮದ್ಯಸಾರ
ಕೈಲಾಸಂ ಹೇಳಿದ್ದಾರೆ-
ಐ ಯಾಮ್ ವೆಲ್ ಪ್ರಿಸರ್ವ್ಡ್ ಇನ್ ಆಲ್ಕೋಹಾಲ್.
-ಜೋಗಿ

sunaath said...

ಬಾರ ಬಾರ ಆವೊ, ಹಜಾರ ಬಾರ ಆವೊ
ಬಾರು ಕಾಯುತಿರುವದು, ಬಾರೊ ಬೇಗ ಬಾರೊ!

ranjith said...

thumbaa chennagide...
adarallu "paaru maado " anthu wonderfull...

congrats,
-Ranjith.